យុវតីមិនស្លៀកហូលផាមួង ព្រោះខ្លាចចាស់ឬ? Trackback
ថ្ងៃនេះជាបិណ្ឌទី១០ហើយ ស្ទើរតែគ្រប់វត្តអារាមទាំងអស់មាន ពុទ្ធបរិស័ទ ទាំងក្មេងទាំងចាស់ បានយកចង្ហាន់ទៅប្រគេនដល់ព្រះសង្ឃ និងដាក់បាតឧទ្ទិសកុសលដល់បុព្វការីជនរបស់ខ្លួន។ ក្នុងចំណោមអ្នកទៅវត្តទាំងនោះ គេសង្កេតឃើញថា យុវតីភាគច្រើន មិនសូវស្លៀកសំលៀកបំពាក់បែបប្រពៃណីខ្មែរដូចជា អាវប៉ាក់ សំពត់ ហូលផាមួងឡើយ ភាគច្រើនពួកគេស្លៀកសំពត់ខ្មៅ អាវស ជាឯកសណ្ឋានសិស្សទៅវិញ។
សង្កេតឃើញយ៉ាងនេះដែរ យុវជន ទ្រឿង វណ្ណា អតីតនិស្សិតនៅសាកលវិទ្យាល័យឯកទេសនៃកម្ពុជា បានឲ្យដឹងថា គេឃើញភាគច្រើន តែវ័យចំណាស់ៗទេ ដែលស្លៀកពាក់ហូលផាមួង ទៅវត្ត ហើយចំពោះអ្នកក្មេងៗ ជាពិសេស សិស្ស និងនិស្សិតវិញ ភាគច្រើនគេ ចូលចិត្តស្លៀកពាក់បែបកូនសិស្សជាង។ យុវជនម្នាក់នេះ បានលើកឡើងថា “បើតាមខ្ញុំវិញ យល់ថា មកពីស្លៀកពាក់បែបនេះ ងាយស្រួល ហើយមើលទៅសម្រស់នៅក្មេងទៀតផង ប៉ុន្តែបើស្លៀកពាក់ប្រពៃណីវិញ មើលទៅសុភាព ហើយចាស់ទុំបន្តិច”។
ស្រដៀងគ្នានេះដែរ យុវតី ច័ន្ទ ខេមរ៉ា បានយកចង្ហាន់មកប្រគេនព្រះសង្ឃនៅវត្ត នាគវ័ន ជាមួយក្រុមគ្រួសារ បានឲ្យដឹងដែរថា រូបគេក៏សង្កេតឃើញដូច្នេះដែរ។ កញ្ញា យល់ថា សម្រាប់ការស្លៀកពាក់មកធ្វើបុណ្យ មិនចាំបាច់ប្រកាន់នោះទេ ឲ្យតែសមរម្យទៅបានហើយ។ ទោះជាយ៉ាងណា កញ្ញា ម្នាក់នេះយល់ថា ការស្លៀកហូលផាមួងស្អាត។ ប៉ុន្តែ ខេមរ៉ា គិតថា ការស្លៀកហូលផាមួង មើលទៅដូចជាចាស់ទុំពេក មិនសមវ័យខ្លួននោះទេ ម្យ៉ាងដោយ ខែនេះ ភ្លៀងធ្លាក់ច្រើនផង ហូលផាមួងពិបាកបោកណាស់ ទើបយុវតី មួយចំនួនមិននិយមស្លៀកនោះទេ។
ងាកមកកញ្ញា ស្រីលីន ជាអាជីវករនៅផ្សារទឹកថ្លា កំពុងពូនភ្នំខ្សាច់ក្នុង វត្តវង្គត់បូរី សង្កាត់ទឹកថ្លា ដែលស្លៀកសំលៀកបំពាក់ហូលផាមួង បានឲ្យដឹងថា៖ “ខ្ញុំគិតថា យូរៗ បុណ្យម្ដង មិនមែនស្លៀករាល់តែថ្ងៃទេ ពិសេសសំលៀកបំពាក់បែបនេះ កម្របានស្លៀកណាស់ កាត់ហើយទុកចោល យូរៗ ហួសម៉ូដបាត់ក៏មានដែរ ហើយម្យ៉ាងសំលៀកបំពាក់បែបប្រពៃណីដូច្នេះ ស្អាត មើលទៅប្លែក ពីថ្ងៃធម្មតា”។ ចំពោះការលើកឡើងថា ការស្លៀកសំលៀកបំពាក់បែបនេះ មើលទៅមានវ័យចំណាស់នោះ កញ្ញារូបស្រស់ម្នាក់នេះ លើកឡើងថា ជាការពិត សំលៀកបំពាក់ខ្មែរសម្បូរបែបខ្លាំងណាស់ អាស្រ័យលើអ្នកស្លៀកកាត់ម៉ូដតែប៉ុណ្ណោះ។ កញ្ញា បញ្ជាក់ ៖” បើចេះជ្រើសពណ៌ស្រស់ កាត់យករាង សមតាមម៉ូដយុវវ័យ មើលទៅមិនធ្វើឲ្យមើលឃើញចាស់នោះទេ តែធ្វើកាន់ស្អាតទៅវិញតែម្ដង តែបើមិនចេះជ្រើសរើស ពិតជាមើលទៅដូចមនុស្សចាស់ហើយ”។
No comments:
Post a Comment